Ka Chun Nunnem

Parfung chawia ka hlim teihnan,
Zilhna hial pawh mi hlan thin;
Ka nunkhua a nawm ve theihnan,
Kawla nichhuak chhiarin a tul thin,
Rualawta ka awm bik lohnan,
Zan thim hial ka tan a tawn thin.

Min hmangaihtu, ka hriat, ka chun nunnem chuan,
Thihna ruam pawh ka tan a zawh hreh hian ka ring lo;
Beisei pha lo mah i, ka hlan ve a che,
Hmangaihna Parthi ka chun nunnem.

Tlaikhua A Lo Nguiin

Tlai khua a lo ngui a,
Thenkhat an nui a,
A then an rui a;
Kei chuan sulhnu hlui ka chhui a,
Lunglenna chuan mi rawn zui a,
Mi umpha a, min vel zui a!

Ngaihnep Harsa

Tahna meuh paw'n luaithli a nul a,
Engkim mai hian thinlai a run a,
Suihlung rualpui an kiam zo ta;
Ngaihnep tum mah i ka thei si lo,
Kawlkunga saw i zun a cham reng si a.

An Til Zo Ta

Zan khua pawh a rei leh ta,
Riakmaw takngial pawn riahna min dil si lo;
Ka hawi vel a, khuavel chu a ngai tein a la awm a,
Thingteparmawi erawh an til zo ta si a.

A Thar Leh Thin

Hun tam liamin kum tamin vei hnan tawh mahse,
Zalampui kawia intawn chang hian a thar leh thin;
Hrilh tur chein huaisenna reng ka nei tawh si lo,
Hmana ka cheng za i bat kha!

Hnemtu

Lunglen thlifimin min chhem,
Thinlai ai ang i zem;
Khuavel chhawnin min hem,
I zunzam erawhin min hnem.

Che I La

Nang hmu lo che ila,
Mangchhiate khan min la chim buai reng ang a,
Naktuk chuan beiseina tel lovin min lo hmuak leh ang;
Ka hmuh hma che khan ka tan hringnun a vul si lo.

Nang tawng lo che ila,
Vaiin ar ang hun leh ni ka la chhiar reng ang a,
Chawlhna zawngin ka nun hi a chau zo tawh ang;
Ka tawn hma che khan ka tan hringnun a vul si lo.

Nang hmangaih lo che ila,
Thilsiam tin mawina hi ka hre pha tawh lo ang a,
Rimawi hlutna te pawh ka theihnghilh hial tawh ang;
Ka hmangaih hma che khan ka tan hringnun a vul si lo.