Ka Chun Nunnem

Parfung chawia ka hlim teihnan,
Zilhna hial pawh mi hlan thin;
Ka nunkhua a nawm ve theihnan,
Kawla nichhuak chhiarin a tul thin,
Rualawta ka awm bik lohnan,
Zan thim hial ka tan a tawn thin.

Min hmangaihtu, ka hriat, ka chun nunnem chuan,
Thihna ruam pawh ka tan a zawh hreh hian ka ring lo;
Beisei pha lo mah i, ka hlan ve a che,
Hmangaihna Parthi ka chun nunnem.

Tlaikhua A Lo Nguiin

Tlai khua a lo ngui a,
Thenkhat an nui a,
A then an rui a;
Kei chuan sulhnu hlui ka chhui a,
Lunglenna chuan mi rawn zui a,
Mi umpha a, min vel zui a!

Ngaihnep Harsa

Tahna meuh paw'n luaithli a nul a,
Engkim mai hian thinlai a run a,
Suihlung rualpui an kiam zo ta;
Ngaihnep tum mah i ka thei si lo,
Kawlkunga saw i zun a cham reng si a.

An Til Zo Ta

Zan khua pawh a rei leh ta,
Riakmaw takngial pawn riahna min dil si lo;
Ka hawi vel a, khuavel chu a ngai tein a la awm a,
Thingteparmawi erawh an til zo ta si a.

A Thar Leh Thin

Hun tam liamin kum tamin vei hnan tawh mahse,
Zalampui kawia intawn chang hian a thar leh thin;
Hrilh tur chein huaisenna reng ka nei tawh si lo,
Hmana ka cheng za i bat kha!

Hnemtu

Lunglen thlifimin min chhem,
Thinlai ai ang i zem;
Khuavel chhawnin min hem,
I zunzam erawhin min hnem.

Che I La

Nang hmu lo che ila,
Mangchhiate khan min la chim buai reng ang a,
Naktuk chuan beiseina tel lovin min lo hmuak leh ang;
Ka hmuh hma che khan ka tan hringnun a vul si lo.

Nang tawng lo che ila,
Vaiin ar ang hun leh ni ka la chhiar reng ang a,
Chawlhna zawngin ka nun hi a chau zo tawh ang;
Ka tawn hma che khan ka tan hringnun a vul si lo.

Nang hmangaih lo che ila,
Thilsiam tin mawina hi ka hre pha tawh lo ang a,
Rimawi hlutna te pawh ka theihnghilh hial tawh ang;
Ka hmangaih hma che khan ka tan hringnun a vul si lo.

Min Hrilh La

I hlim a nih chuan min hrilh la,
I nuihin ka lam lo hawi kher ang che;
I hlim hmel hi ka tan damdawi tha ber a ni si a.

I lungngai a nih chuan min hrilh la,
I tah chuan ka awmah beiin mi kuangkuah ang che;
Ka hnem thiam lo che a nih chuan ka tahpui ve ang che.

I khua a har a nih chuan min hrilh la,
I lunglen changin darzam han khawng ri ang che;
Khawi hmunah pawh, eng hun pawh nise, i tan ka awm reng ang.

Ngam Huai

Ka nimin hun liam ta kha ka hralh ang a,
Ka naktuk hial pawh ka dahkham nang e!
Mi ta hawhin lei hial pawh ba dawn mah i,
Chhan tha tak vanga tiah ka inngai ang;
Ka hming hnaisailo i lam ri ka hriatna tur a nih phawt chuan!

In My Dream

Last night in my dream,
You were standing by a stream;
When I awoke in the light's beam,
I called out your name with a scream.

Ka Ngai Che

Zingtianah lenkawl eng ka thlir a,
Romei paw chuk karah i zun a zam chiai a;
Ka ngai em em che a.

Ni a lo tlangsanin khua ka chuan a,
Raltiangan tuahpui leh vaube an par tan a,
Ka ngai zual sauh che a.

Tlaikhua a lo nguiin thlang lenkawl bawk ka thlir a,
Sirva tin kawp chawiin an leng siau siau a,
Ka ngai leh em em che a.

Zantiangah laikhum belin nun hlui ka dawn kir a,
Bawh-ar pau ri a chuai a, reh ri chauh a rik lai hian
Ka mamawh tak zet che a ni.