Sazupui ka vulh ve a

Sazupui ka vulh chakna hi a rei tawh hle a, hmanah Shillong-a lehkha kan zir laiin Bah Kama fapa u Mapuia  khan a vulh thin a, an in ka kal pelh apiang khan ka thlir ning lo a ni ber mai. Tin, bazarah khan sazupui sa kha kg 1 Rs 120/- in kan lei thin a, a thianghlim a, sa tui tak a ni bawk. A sa tui zia chu thuhranah lo dah ta ila, an thianghlimin an no ser mai a, a mitmeng sen nalh lutuk te, an beng sei an han tun va thin te hian nun hi an ti hlim ngawh ngawihin ka hre thin.

Nikum khan ka thianpa Zatea’n sazupui nupa chu min pe ve hlauh mai a, an hmingah Anil leh Anjali ka phuah nghal a. Unau mah nise, thla li-a upa an nih meuh chuan an inunauna an inhre chang tawh lo a, hmangaihna lipui an liluh bawrh bawrh ni hian a hriat a. Kan chhungkua hian kan duatin kan han ngaihsak khawp a, sazupui lo vulh tawhte tih dan te kan zawt kual a, an chanchin zirin internet lamah hun tam tak ka hmang a, tuk tin leh tlai tin chaw tha tha ka hlui hlawm a, khawhar an hnem ve chiang teh a sin.

Thla ruk an nihin a vawi khatna atan Anjali chu a rai ta tlat mai a. Tleirawl mai nia kan hriat avangin a rai tih chu keini pawh chuan kan hrethiam lawk lo a. Sawi lawk miah lovin tuk khat chu note pahnih an lo hring reng hi a lo ni a, a thi a chhuak nasa hle a, a lo inhliam ve nasa ngiang mai. Nimahsela, chung no duhawm tak takte chu nikhat pawh an dam lo. A thla lehah chuan an nei leh nghal mai a, tun tum chu pathum zet an ni. Ni hnih an dam a, an thi leh ta. A ngaihna kan hre lo hle mai. A hnuah thlasik khawvawh ber laiin zan tairekah an nei leh , hei pawh ni hnihnaah an thi leh a. Kumin April thla khan vawi khat dang an nei leh a, pali lai an nei a, dam chhuah tir ve hram kan duh laiin puih ngaihna an vang angreng lawi sia, ni li an dam a, an vain an thi leh phiar a. Ran vulhah hian ka tluang lo em ni dawn tih ka inngaihtuah a, kan naupan ve lai pawn ar 60 chuang te pawh keimah chauhin ka lo enkawl ve tawh thin kha a nia, ka tluanlohna tur reng reng ka hre si lo. Sazupui vulh chu ka beidawng ta khawp mai a, a engapawh chunise, vawi khat na na na chu no nei leh phawt se, an damchhuak zo lo a nih leh ngai chuan a tihral dan ka ngaihtuah tawh mai ang tih rilru ka pu hman a. Kan calendar-ah chuan ‘Sazupui no neih ni’ tiin April 17 chu ka chhinchhiah ta nghe nghe a.  

A no neih hnunhnung ber atanga a thlakhatna cham chiah May 17 zan chuan Anjali chuan note 6 a hring leh tlat mai. Khawlum lai a ni bawk a, an thi tawh tur a nilo tih chu ka thupui ber a ni ta. Tichuan, in hrang kan sak sak a, bawm chhung lum nuam takah note duhawm tak takte leh an pui Anjali chu kan dah hrang a, hmun finrialah an in chu kan hung ta daih a. A tirah chuan paruk an ni a, mahse a te ber, a budelh chuan ni hnih chiah min dam pui a, panga dang te erawh an hrisel thain hnute an dawng tha tih hriat tak hian an sen deuh lal a. Chutih lai mek chuan an pa ber, Anil-a khawhar lungleng lutuk hi a khawngaihthlak khawp mai. Chaw a ei hleithei lova, a che chang peih lo a ni ber mai. In pakhat zawkah erawh Anjali te nu fa rual chuan hringnun hmachhawn dan an zir ve mek a, a ni telin an thang a, kan hlim tlang hle mai.

Ni thum-a upa anih vel atangin an hmul a to tan a, ni sawm an tlin chiahin an mit a keu a, ni 14 an nih atangin hnim hnah nem an ei thei tan, hei hi ka chhinchhiah dan a ni. A note zingah chuan pakhat an piantirh ata lian fal deuh hi a awm a, chu chu a mit pawh a keu hmasa ber a, engkimah a unaute hma a hruai nia ka hriat avangin a hmingah Lalhmahruaia kan ti a! A unau dangte hming chu Harnandez Vanbawiha, Kungpuii, Lee Dong-uk, leh Sonia te an ni. Tun tum chu Pathianin min enkawl sak a, hrisel takin an thanglian ve zel a, kan lawm em em a ni. Leilung dan ina a ruat ang zelin thil hi a lo thleng a lo ni a, no an neih hmasak khan hnute hnek luih tir tumin vawi tam ka bei a, mahse ka hlawhtling lo anih kha. A hun tak ah leilung dan/khuarel chu a lo inherchhuak a, Anil leh Anjali te pawn chhungkaw thar, chhungkaw hlim tak an nei ve ta.

Roses and You

The roses they come alive in full bloom,
Brightening the air amidst pouring rain;
Casting away the pain, sorrow and gloom,
Life becomes full and complete once again. 
 

In beauty they paint the colorless air,  
Like rainbows, they blossom in full color.
‘Roses do have thorns’ but i do not care;
I’m like a bee, lured by lovely odor. 
 

These roses and you are all that i want,
To be near me in spring, summer and fall.
Out in the garden i went to pluck one,
In blissful ecstasy, i took them all! 
 

They are for you my sweet dove, for i know 
You love roses – red, violet and yellow.

Nang Chauh

I laka ka lungawi loh changte hian,
Min ti lungawi theitu chu nangmah chauh i ni a,
I chunga ka thin a rim changte hian,
Min bengdai theitu chu nang chauh i ni lawi bawk si.
I awmdan ka hriatthiam loh changte hian
Min hrilhfiah thei tu awmchhun i ni.
Lunglenna rauvin min man changte hian
Min hnem theitu awmchhun i ni a,
Khawhar taka nunkhua ka hman changin
Min chhungkhata min muan theitu awmchhun i ni.
Hmangaihna thawnthu hi nangmahah a intan a,
Nangmahah vek a tawp bawk si anih hi.

To Daddy

When we hear melancholic rhymes of chirping birds;
Your memories lingers on in our hearts,
On that fateful day of May Ninety Nine,
We said goodbye and the stars stopped to shine.

Should i have known it much better that life's so brittle,
l should've loved you more and sat there to settle;
I should have been there when you called,
To embrace your warmth before that bell's toll.

It's true you are now safe in the hands of the angels,
Away and untroubled by earthly riddles;
And life goes on with tons of challeges to pursue,
But sometimes, its hard to move on without you.

HAKUNA-MATATA

When the world turns rude and unfair,
And when nobody else seems to care;
When darkness falls and you can’t see
The path, you are down on your knees,
Don’t lose hope; you shall stand yet again,
For there should be sunshine after rain.

When shadows chases behind and you’re scared,
When you face perils you do not dare;
When life confronts you with unsolved mysteries,
And when you are eaten to the bone by blasphemies,
Don’t lose heart; you shall go on yet again,
For there should be laughter after pain.

When the road seems thorny and narrow,
And when death shivers you to the marrow;
When your heavy load over-burdens you,
And when others betrays and bid adieu
Don’t lose confidence; soon you shall conquer
For there should be peace after war.

Life brings in miseries and good fortune,
Hard times won’t last when you’re in tune
With courage, hope and positive thinking;
Look beyond the clouds, there’s a silver- lining,
No worries, my friend: "Hakuna Matata",
Bad dreams are over: "Mangchhia a kin ta".

Lemziak Thiam Ni ila

Lemziak thiam ni ila chuan,
Suangtuahna min mawlhtu hi milemah ka chan ang a,
Van dum pawl hnuaiah a thiangtea leng dunin,
Chawnban insi riala nui dunin
Hawilopar ka tawn nang che.

Lemziak thiam ni tehreng ila,
Ka ziahfung hian i hlimthla leh zunzam
bak ziah tur a hre mawlh lo'ng;
Lemziakah bak nang ka tawng dawn si lo che a.

A thamral ta si

Chhingmittui nen chiang lo ruaia thangharhin,
Hriatthiam loh thil mak takin min mawlh a,
Tawnmangah amah ngei chu dar ang ka lo tawng a,
Mahse zing turni zungzaman a thamral ta si.

Hmeichhiate Leh Dan

Ram dinhmun leh nitin khawsakna nunphungin hma a sawn mek zel laia kan thanhnanpui ve tur thil pawimawh tak chu Dan hnuaia kan nihna, chanvo, dikna leh kan tih ve tur te hriat hi a ni a. Hmeichhiate hi mipa te aia hnuaihnung zawk leh dinhmun hniam zawka ding nia ngaihna a tam hle a, taksa chak zawng leh tih theih zawnga chhut chuan a dikna chin a awm a, amaherawhchu Dan leh hrai hnuaiah erawh chuan kan intluktlang vek a ni. Tunhma atang tawhin hmeichhiate hi pawikhawihna tuartu (victim of crimes) an lo ni fo tawh a, tun thleng pawh hian a la ni zel awm e. Tin, in leh ram roluah thu hlaah te, nupa leh nupa inkarah te pawh hmeichhiate hian dinhmun hnuaihnung zawk chelh anga ngaihna leh hriatna a lian hle a, a dikna engemaw chen awm ve bawk mahse, he ngaihdan hi Dan hriat mumal loh avanga ngaihdan mawl satliah ve mai niin a lang. India ramah phei chuan hmeichhiate hmuhsitna, tihduhdahna leh inthliarhranna a tam em avangin India sawrkar hian hmeichhiate dinhmun chawisan nan nasa takin hma ala a, dan thar tam tak a duangchhuak a, National Commission for Women hialte pawh a din a ni. Chung hmeichhiate tana dan awm leh hman mek te chu tun tum hian a langsar zual leh a tangkai zual hman mai thei ang chi te kan zir ho dawn a ni.

India Danpui leh Hmeichhiate:   Hmeichhia leh mipa te intluktlanna (gender equality) hi India sawrkar hian a ngaih pawimawh em avangin Constituton (Dan pui) ah pawh hmun pawimawh tak a chang a, Preamble, Fundamental Rights, Fundamental Duties leh Directive Principles of State Policy ah te ziahlan an ni hlawm a ni. India Danpui hian hmeichhiate hnenah intluktlanna a pe satliah mai ni lovin state sawrkar te chu hma laa an hmasawnna tur ruahmanna siam turin a ti theuh bawk a ni.

i)             Dan hmaah mipa leh hmeichhiate chu thuhmun reng an ni a, angkhata rorel sak tur a ni.( Article 14)

ii)            Sakhuana, hnam, nihna, pian leh murna, mipa leh hmeichhia nihna ang zawnga inthliarhranna siam hi State sawrkarte khap tlat a ni. Article 15

iii)          State sawrkar chuan hmeichhiate leh naupangte tan a bik takin dan a siam thei bawk. (Article 15 (3).

iv)          State sawrkar hnuaia office tinahnalak chungchangah diltu chu mipa an nih vang emaw hmeichhia an nih vang emawin induhsak bikna a awm tur a ni lo. (Article 16)

v)           Mipa leh hmeichhia ten hnathawh in ang rengah hlawh in ang an hmu/dawng tur a ni. (Article 39d)

vi)          State tinin nu nau pai mek leh nau neite tan chhawmdawlna a siam tur a ni (Article 42)

vii)        India rama mipui zawng zawngten in unauna rilru an put theih nana hmalak hi state mawhphurhna a ni a; hmeichhiate zahawmna ti chhe thei thil reng reng paihbo hi state mawhphurhna a ni bawk. (Article 51A(e)

viii)       Municipal Council a seat awm zawng zawng atanga hmun thum a thena hmun khat te chu hmeichhiate tan liau liaua dah a ni. (Article 243T (3)

Criminal Law leh Hmeichhiate:  Criminal law kan tih chu sawrkarin Indian Penal Code 1860 hmanga thil sual nia a puante an ni a, hremna pe theitu chu sawrkar bawk a ni. Sawrkar pawikhawihna awm thei tam tak zingah hmeichhiate laka pawihkhawihna te pawh ‘crime’ anga chhiar tel an ni a, a langsar zual i han chhui ho leh dawn teh ang:

1.   Pawngsual ( Sec 376 IPC) : Mipain a hnuaia tarlan anga hmeichhia a pawl chuan pawngsual a ni:

a)   Hmeichhe duhthlanna ni lovin

b)   A hriatna/phalna tel lovin

c)   A phalnain, chu phalna chu amah emaw a chhungte/thiante emaw thah emaw na tuar tir tura vauna avanga lak a nihin.

d)   A phalnain, mipain hmeichhia pasal a nilo tih a inhriata, hmeichhe pasal lem changa chu hmeichhia chu a bumin..

e)   A phalnain, chu phalna chu rilru lam kimlohna avang emaw ruihhlo ngaih avang emawa phalna a pe tih a inhriat lohin.

f)    A phalnain emaw, a phalna te loin emaw, kum 16 aia naupang a nih hrim hrim chuan.

A chunga tarlan anga mipain hmeichhia a pawngsual chuan kum 7 atanga kum 10 thleng lung in tan tir theih a ni, dam chhunga tang tura pawhsei theih a ni bawk.

2.   Nunrawnna (Sec 498A IPC):    Hmeichhia, a pasalin emaw a pasal chhungte in emaw a chunga thil an tih avanga mahni intihlum emaw, mahni intihnat duhna a neih phah emaw, a hriselna atana tha lo tur thil tih duhna a neih phah emaw, amah leh a chhungte atanga thil phut neih avanga tihduhdah anih chuan, chu a pasal emaw a chhungte emaw chu kum thum thleng lung in tan tirh theih an ni a, pawisa chawi tir theih an ni bawk.

3.   Inrukbo (kidnapping) Sec 361 IPC:    Mi tu pawhin hmeichhia kum 18 la tling lo te a enkawltu hriatna tel lo a a thlemchhuak emaw, ala bo emaw a nih chuan ‘kidnap’ a ni a, kum 7 thleng lung in tan tir theih a ni a, lei chawi tir theih an ni bawk.

4.   Zahawmna ti bawrhbang (Sec 354 IPC):   Mi tupawhin tharum hmang emaw hmanrua hmang emawa mihring zahawmna ti bawrhbang thei zawnga hmeichhia chunga kut a thlak chuan kum 2 lung in tan tir theih a ni a, lei chawi tir theih a ni bawk a, a pahniha hrem theih a ni bawk.

Tin Section 509 IPC naah chuan mi tupawhin hmeichhe zahawmna tichhiat tuma thu a sawi emaw, zaizirin a lantir emaw, lemziak leh thil dang engpawh a phhochhuak  emaw a nih chuan kum khat lung in tan tir theih a ni a, lei chawi tir theih a ni bawk a, a pahniha hrem kawp theih a ni bawk.

5.   Nau tihtlak tir (Sec 312 IPC):     Mi tupawhin, hmeichhe naupai lai, a paitu nunnain a tuar dawn vang nilova chhan dan avanga a naupai a tihtlak tir chuan, a tihtlak tirtu chu kum 7 thleng lung in tanga hrem theih a ni a, naupaitu hriat loh laia tihtlak tir/ tih tlak sak anih phei chuan kum 10 atanga dam chhung tang tura hrem theih a ni. Tin, nau tihtlak tir avanga a paitu nunna hialin a tawrh chuan a titu chu kum 10 atanga damchhung tang tura hrem leh lei chawi tir theih a ni.

6.   Nawhchizawrh tir (Sec 372 IPC) :      Mi tupawhin hmeichhia kum 18 la tling lo te nawhchizawrhna emaw an taksa atanga sum hailut thei tura a zuar/hralh/hawh chuan, kum 10 lung in tan tir theih a ni.

7.   Pasal nia inchhal (Sec 493 IPC):       Mi tupawhin minu, a pasal lema changin lawithlem sela emaw, bumna hmanga hmeichhia hnena a pasal anga a inchhal a, nupa nun hial a hman pui chuan kum 10 thleng lung in tan tir theih a ni.

8.   Hming thup tur (Sec 228A IPC): Pawngsual tuartu te hming reng reng hi vantlang hriata thup tur a ni a. Chanchinbu leh chanchinthara tihchhuah anih pawhin an hming langlo zawnga puanzar tur a ni. Chutiang tilui chu kum 2 thleng lung in tan tir theih a n ni.

9.   Pawikhawiha puh avanga hmeichhia man an niha, an thawmhnaw leh taksa dap a nghai a nih chuan, police, hmeichhia ngeiin a dap tur a ni a, fimkhur, hawihhawm leh zahawm takin a dap tur a ni. (Sec 51(2) CrPC)

10.       Nupui enkawlna/chawmna (Section 125 CrPC):      Criminal Code of Procedure 1973 chuan hmeichhia, naupang leh kum upa lam mahnia inenkawl thei lo te enkawlna dan Sec 125 naah a siam a. Mipain a nupui a enkawl duh loh chuan hmeichhia chuan Court ah zualkoin a pasal lak atanga enkawlna dawn a phut thei a, court-in a remtihpui chuan a pasal thlakhat hlawh zat/thawhchhuah zat milin a inenkawlna tur pe turin a pasal chu a ti thei a ni. Fa kum tling loten nu lama awm an thlan zawka Court pawhin a remtihpui chuan a fate enkawlna hi mipa/pa chuan a tum ngei ngei tur a ni.

11.       Protection of women from Domestic Violence Act 2005 hian hmeichhiate, hmeichhia an nih avang liau liaua venhimna dan a nei bawk a. He danina a tum ber chu, hmeichhiate hi mihring mihrinna taka chak lo zawk an nih avangin an nihna leh zahawmnate dan hmanga humhim leh venhimsak a ni. He dan bu Section 3 nain a sawi dan chuan hmeichhiate chu chhan awm lova tharum hmanga hliam emaw tihnat emaw phal a ni lova, an hriselna tichhe thei zawnga tih nat khap tlat a ni. Hei hian hmanrua emaw taksa bung eng emaw ber hmang emawa hmeichhe chunga kutthlak ang chi te a huam a. Nupuii chhungte laka thil hlu eng emaw phut avanga nupuite chunga kutthlak lek phei chu a case a rip hle  a ni. Tin, kut inthlak mai bak hian tawngkam na taka haute, nawmnah taka biak leh auhte, diriam taka an chungchang sawite, an zahawmna ti hniam thei zawnga tawngchhuah leh thiltihte pawh khap vek a ni. Hmeichhia an nih avanga an chan ai chhuhsakte, hmeichhia an nihna remchanga laa an thawh theih ve reng hna atanga lo dante pawh phal a ni lo. Heng kan sawi te hi domestic violence tih a ni a, a tuartu chuan Protection Officer kaltlangin emaw ama thuin emaw Magistrate hnenah complaint a thehlut thei a, Magistrate-in a thu thlente alo pawmpui chuan chutiang harsatna a laka thlentu hnenah chuan a thil tih bansan turin thuchhuah a siam thei a, zangnadawmna pe turin emaw hmeichhe chanai alo chhuhsak tawh chu pe kir leh turin emaw an thu a rem thei bawk a ni. Chutiang a nih hnua Magistrate thupek a zawm lo a nih chuan kum khat chhung lung in tan tir theih a ni a, Rs 20000/- thleng chawi tir theih a ni bawk a, a pahniha hrem kawp theih a ni bawk.

12.       The Information and Technology Act 2010 Section 67 chuan zahmawh rawngkai emaw, mi pangai/vantlang ngaih aia uchuaka hmeichhe nihna pholan a khap tlat bawk a. Hei hian hmeichhe che chhe lai thla lo lak ruka thehdarh te, an zahawmna hloh vek thei khawpa mualpho taka tlang than tir ang chi te a huam a; chutiang titu te chu man chhuah an nih chuan kum 5 atanga kum 10 thleng tan tir theih an ni a, cheng nuai 2 thleng chawi tir theih an ni bawk.

Civil Law leh Hmeichhiate: Civil Law tih hi mimal dan tih a ni bawk thin. Roluah chung chang thute, nupa inkara thubuai awmthei te, fa lak, fa chawm, in leh ram thubuai adt. te hi civil law an ni a. He thupui bikah hi chuan kan Hnam Dan (Customary Law) hian min phuar a, thubuai hla buai kan nei a nih pawhin Pawi Lakher Region Hnam Dan 1974 anga chinfel tur a ni. Kan Hnam Dan bua hmeichhiate dinhmun leh chanvo thenkhat lo tarlang leh ta ila:

1.   Nupui pasal inneih chungchangah (Sec 20): Nupui pasal innei chu palai hmanga mipa leh hmeichhe chhungte inbe rem a, inneihtir theituin a neihtir hi an ni. Chutianga innei lo chu dan hmaah nupaa pawm an ni lo.

a.   Falak -        Hmeichhiain pa hriat loh fa alo pai chuan pu fa a ni ang a, naute chu hmeichhia a nih chuan pasal a neih hunin a man Rs 60 a nuin a ei ve ang. A thuam nan a nuin engmah a seng lovang a, a lawi nan a pu emaw, a man eitu tur a piangten sen tul zawng zawng an seng ang. Mipa a nih chuan a duhna apiangah a awm thei ang a, a awmna apiangten nupui an nei sak ang.

b.   Man bo -    Hmeichhia, fa neih tawh sum chhuahin kal sela, sum pek vek tawh hnuin lunglen vangin emaw, fate ngaih vangin emaw let leh duh ta sela, chhungte remtihnain man bovin a lut leh thei ang. Lut leh a nih chuan a chhungten a man an thing thei lovang a, a thuam erawh chu a hlip tur a ni a, an tuithlar thei bawk. Hetiang tho hian hmeichhe uire pawh an let leh thei a ni.

c.   Nupui pawikhawih –    Hmeichhe pasal nei laiin thil a ruk chuan a pasalin a rul tur a ni. Lung in tanna thama lian pawi a khawih erawh chuan amahin a tuar ngei tur a ni. Tin, hmeichhia, uirein emaw, suahsualna dang lakah miin puhin a puhtuin lei chawi sela, nutain emaw man eitu apiangin an dawng ang. Mipat hmeichhiatna lam tih loh kawng dangah hmeichhia miin puhin a puhtuin lei chawi sela, chu erawh chu a pasalin a tel thung ang.

d.   Nupui tlan koh – Nupui nei laiin nula dang nupuia neih a duh avangin a nupui ma se la, nula chuan inneih duh leh ta si lo sela, a nupui tlan chu a kohsak tur a ni. A nupui chu haw duh ta lo se, sumchhuah theih a ni lo.

2.   Inthen chungchang (Sec 34-43):            Tupawhin a nupui ma sela,  mak hnuah man ba pek a ngai tawh lo. Amaherawhchu, a puin a delh hman tawh a nih chuan pu man chu a chawi tho vang. Hmeichhia, a pasal ram danga a kal bo hlanin ama thuin chhuak ta se la, dan pangai chuan sum chhuah tur a ni. A pasal chuan a lo hawin hruai duh lo sela, mak angin a kal ang a, koh hnuaa hmeichhia a haw duh loh a nih chuan sumchhuah a ni ang. Nupui pasal inneih hnuin mi lo a ta sela, a a lo zawk chuan kum thum a enkawl tur a ni. Kum thum ral hmaa an inkal tir chuan ma anga ngaih tur a ni a, kum thum ral hnua a atna ala reh lo a nih chuan peksa changin inkaltir theih a ni. Tin, hmeichhia, a pasala chhungten an ma thei lo a, a ma thei tu chu pasal chauh a ni.

3.   Ro luah chungchang (Sec 89): Dan naranin kan Lai danah chuan hmeichhia ten pa ro an khawm thiang lo. Ro luahtu chu fapa upa ber a ni a, unau mipa pahnih emaw pathum emaw lai awm se, ro chu an insem tur a ni a, a upa ber hminga rokhawmna chu a kal avangin a niin a chang tam ber ang, tin, miin fapa a neih loh chuan a unauten a ro an khawm sak thin. Hmeichhiaiin fa nei lovin pasal sun sela, a pasala thihsan ro chungah chuan Court in awm a tih angin ro a sem thei ang.. Amaherawhchu, pain ‘thurochhiah’ hmanga hmeichhe fa hnena ro a pek chuan a nuta ten an sawisel thiang lo.

Awle, dan hnuaia hmeichhiate dinhmun langsar leh tangkai zualte a tlangpuiin kan sawi zawr zawr a ni a, heng bakah hian tam tak sawi sen loh leh sawi hmaih palh te pawh a awm thei ang. Thi engpawh ti ila, dan hmanga tih/chinfel hi a fin thlak a, a hnua buai leh zelna tur min pumpelhtir thin a ni. Chuvang chuan min phuartu dan awm thei ang angte hi phak ang tawka inzira hriat theuh hi kan tum tur a ni. Court hmaah chuan ‘chumi khami dan chu alo awm a ni tih ka lo hre lo alawm’ tih hi chhuanlam tling a ni lo.

          Ka lawm e.

(A Seminar paper presented on LWA Day, 24^th April 2010 at Cheural)

Khawtlang Nun Siam That

'Khawtlang nun siam that' tih hian a huamzau hle mai a, a siam that tur lai tam tak sawi sen loh a awm ang a, a siam that dan tur pawh sawi sen loh a awm ngei ang, tin, kan siam that duh dan thlengin a in ang lo nuai ngei ang le. CYLA meuhin kumpuan thupui atana 'Khawtlang nun siamthat' tih an thlang hi a ropui a, ngaihtuahna a kal thui tir hle nghe nghe a ni. He thupui thlan anih ruala rilrua lo lang nghal chu kan khawtlang nun hian nasa takin siamthat alo mamawh tawh a ni maw tih hi a ni. 

Khawtlang nun: 'Khawtlang nun' han tih hian a a kawhtum ber nia lang chu mimal (individual) te kan inkungkaihna emaw, thil pakhat leh a dang vanga inlaichinna kan neihte emaw pawl ang leh a huho mai nilova mimal tena khawtlang, vantlang leh midangte tana hlenchhuah tur mawhphurhna kan neih hrang hrang kan tih leh hlenchhuahte hi an ni a. Chhungkua kan awm a, chhungkaw hrang hrangin veng khat emaw khaw khat emaw kan siam a, chung ho inbelhkhawm, a huhoa kan khawsakna hi khawtlang nun chu a ni mai awm e.

Siam that : Thil reng reng hi siam that a ngai anih chuan a chhia emaw, a hmantlak tawh lo tihna emaw a ni thin. Kan khawtlang nun meuh siam that a ngaih chuan a chhe lai, thawmthat a ngaihna lai a awm a ni ngei ang. A chhe lai kan hriat phawt loh chuan a siam that tur lai kan hre thei dawnlo a ni. Chuvangin a hmasa berah chuan a chhe laite kan zawn chhuah phawt a tul ang a, chumi kan hriat hnu chuan motor chhia mechanic chauhin an siam tha thei ang mai hian tute nge siamtha thei tu tih kan zawn chhuah leh a ngai ang a, a siam that nan hmanrua kan nei tha tawk em tih thlengin kan ngaihtuah a tul dawn a ni.

A chhe lai : Siam that ngai hi sawi sen loha tam a ni a, kan hriat chhun pawh kan sawi seng kher lo ang a, a tlangpuiin a point te te in i han thailang dawn chhin teh ang:

1. Ram rorelna: Kan ram hi agrarian culture kan tih mek lai hian eizawnna kawnga mi tam ber innghahna chu sawrkar a ni tlat a ni. Mahnia ro inrel hrang thei turin automous district council kan nei a, mi tam takin kan council-ah hna hmuin ei bel berah kan hmang mek a, a chhunga thawk ve lem lo te pawhin development leh contract hna kan chang a, kan zawng a, kan hmu a, chu chu kan innghahna bulpui ber a ni. Kan council budget tlemte chhim pha ve tura kan inchuhna rilru huamhap leh duham hi kan khawtlang nun ti chhe bertu a ni thei ang em?

Ram hruaitu ni tura pen chhuak tam tak te rilru hi a chhe lai siam that ngai a ni leh ang em aw ka ti bawk a. Khawvelah hian engtiklai mahin thuneihna inchuh hi a tawp ngai dawn lo, a tu mai pawh hian thuneih kan duh vek a, a thiam leh a theiin an thleng sang thin. Development sem ve thei tu ni duh vang ringawta inpe te, mahni inhai vur chaka zuang lutte leh thih thlak sawi ve tur hrim hrimah tia inpea thlan tlin ni bawk si te hi engzat tak awm ang maw? Ruahmanna awm map loa pawisa fai sem thinte hian tun thleng hian engmah min la thlen lo chu a nih hi. Hna lak chungchanga kan kalphung hi a chhe lai siam that ngai lai a ni leh pek! Kum over tawh sawrkar hnaa an lut hmuh hian nuih a za lo, a thinrim thlak a ni. A thawk nghette pawhina thawh tur an neih loh laia muster roll-a inlak vak vakte hi enge a awmzia ni ta ngai ang le? Thawh tur a awm miau loh avangin kan work ethic kan hloh a, sawrkar hna thawh chu awlsam taka inlak hauhsakna maiah kan ngai zo ta. Miin a hna thawh thiam miah loh sorkar hna dil a hreh tawh lo a, certificate leh document lem siam a hluar phah a, mi pakhat rilru diklo khan midang tam tak a kang kai a, hlawkna an lo tel ve theuh bawk si chuan thil dik lo pawh nise an lo ti mai tawh thin niin a lang.

Kan ram hruaitute (MDC/MLA/MP) te hi development leh contract hna sema hnalak chungchang ringawt buaipui tur an ni lo a. Legislature an nih a vangin an tih tur pawimawh ber chu mipui inrelbawlna tura dan siam a ni. Dan hi neih ringawt a tawk lova, kenkawh a ngai a ni. Kan ram thanmawhbawk lian tak chu dan kengkawhtu (enforcement) lam kan chak tawk lo hi a ni pakhat. Dan chu kan nei tha alawm, nimahsela, engvangin nge kawng engkim deuhthaw ah hian dan pel deuh leh dan ang ni lo deuha thiltih hi a awm reng thin mai le? Lei man/chhiah hi kan ram revenue lian ber a ni a, mahse khua leh tui tam zawk hian leiman kan ba niin an sawi thin, Revenue Deptt-a thawkte inthlahdah vang a ni thei an ngem? Ramsa leh ramngaw humhalhna dan kan nei tha, nimahsela, engvangin nge miin sa an la kah reng a, thing an la zai ruk reng a, an hralh reng tho si le? Enforcement lam kan chak tawk lo a ni ngei ang.

Kohhran - Kohhran hi kan sawisel phak a awm lo nachungin role pawimawh tak an neih ve si avangin sawi tel lo theih a ni lo. Kohhranah pawh hian a chhe lai siamthat tur tam tak a awm a. A thlarau nun changsang aia a neinung apiang an tlatlum zawk tihte hi chu thudik awmsa kan hriatchian a ni vek ang a. Kohhrante hi sorkar khalh ngil tu tur pawimawh tak an ni ngei mai a, mahse helamah hian an aware leh lutuk a, an kuanglo an nawr thin em aw tih chang ka ngah mai. Khawtlang nun siamtha theitu pawimawh ber pakhat a ni a, a tih turah erawh a chian a ngai thung. Kohhran mipui te kawng dik zawh tur leh sual laka inthiarfihlim tura inzirtir hi kohhran tih tur a ni. Kohhran miten chutiang zirtirna kan lo bawhpelh deuh nia alan pawha zilhhau tur leh tawngtaisak tu tur chu Kohhran tho a ni. Kohhran chuan mipuite thlarau nun hi vei ber se, thlarau lama inkaihhruaina dik tak kan dawn a kan zawm theuh chuan kawng engkimah a lang chhuak ang a, chu tah chiah chuan kan khawtlang nun hi siamthatin a awm ang.

Chhungkua : Political Socialization-a insitution hmasa ber leh pawimawh ber chu chhungkua hi a ni. Naupang chu a kalna awm kawngah chuan zirtir ula, a lo upat hun pawhin a thlah lovang tih hi a dik tak zet a, mi tha leh mawhphur thei khawpa fel chherchhuak tur chuan chhungkua a pawimawh ber. Pawnlamah hian kan chhungkua mizia a lang thin an tih hi a dik a nia. Fate kilkawi thaa kawngdik kawhhmuh tur chuan nu leh pa thil tha duh mi an neih a ngai. Nu leh pa tam zawk hi chuan kan fate hi kan ngaihsak tawk lo a, khawlaia an nun kan chhuizui peih lo, thununna dawng tha lo na na na chu khawtlang tana mawhphur tlaka thanglian turin a beisei theih loh. Korean culture-in kan inchei dan nunphung nghawng nasat zia kan hria; chhungpui nu berin Korean film a atchilh tlat a, chhuna a awmna a pianga a sawi chhunzawm zel phei chuan a fate chuan Korean film star te inchei anga an inchei loh takah!

Mimal : Kan chunga thil thleng engkimah hian mimal (individual) hi kan pawimawh ber, a chhe lai siam tha theitu zingah pawh mimal kan pawimawh ber a ni. Mahse, a pawi lai ber chu mitin hian insiamthat kan tum si lo lai tak hi a ni fo. Chantawka lungawi thei lo duhamnaina a bawih kan ni deuh vek ni hian a hriat a. Chu rilru chuan midang itsikna min neih tir a, kan ta aia midang ta kan hmuh len theuh avangin mahni tanghma theuh kan hai ta ngat ngat a, chu chuan kan khawtlang nunah a chhe zawngin nghawng lian tak a nei ta a nih hi. Thenawmte ramri nek rana insakte, khawlai leh hmun langsara bawlhhlawh paih mai chingte, vantlang kawng hnaih em em a in sethlam duhna mimal rilru duham tak hi kan khawtlang nun ti chhe tu a ni.

 Tlawmngaihna : Kan tunlai khawsak zia leh kan khawtlang nun te hi chik taka ka thlir hian Lai/Mizo te hi ‘tlawmngaihna’ nunpui hnam nia kan inchhal fo hi a dikhlel deuh em aw tih chang ka nei thin. Kan Mizo thawnthu tam takah phei chuan tlawmngaihna ai mahin mi rethei leh fahrah hmuhsitna leh endawngna tam tak hmuh tur a awm. Hei hian ngaihtuahna thui tak min neih tir a, kan tunlai nun nena hmehbel phei chuan hnam tlawmngai tia inchhal fo hi a dik thei dawn em ni ka ti thin. A enga pawh chu lo ni ta se, tlawmngaihna nun chu tunlai chhanah a tlahniam ta hle tih hai rual a ni lo. Peih chin chiah thil tih hi tlawmngaihna nunin a huam tel lo tih kan hriat a tha. Mitthi lumennaah kan kal a, kan mut a chhuak a kan haw leh mai thin angte hi thil tha ti chu kan ni, mahse tlawmngaihna nun a thleng pha lo; mut chhuak chung chunga khawtlang mualpho hlau leh khawhar chhungte lainat avanga kan menpui hram hram hian tlawmngaihna alo intan chiah zawk a lo ni.

Siam thatna: A chhe lai siam that hna thawk tur hian kan zavai hian kan tling tawk vek tih hi hre hmasa ber ila a tha awm e. Kan tih theih leh kan tlin tawk chu a in ang lo ang, nimahsela, kan awmna theuha kan phak ang tawk theuha tan kan lak chuan kan khawtlang nun chhe tak hi kan la siam tha thei a ni.

Moral reformation: Kan rilru sukthlek thlak danglam tluka mamawh kan ram hian a nei lo. Kan sawrkar kan sawi chhia a, kan politician te kan dem rual hian mipui te hian mawhphurhna lian tak kan lo nei ve reng mai. Tuna kan ram hruaitute hi ram hruaitu an ni kumhlun dawn lo, nakina la thlaktu tur te chu tuna mipui zinga mite tho hi kan ni. Pawlah hian hruaitu tha ni tur chuan member tha tak nih phawt a ngai an ti thin, chutiang bawk chuan khua leh tui tha nilo chu ram hruaitu tha an ni thei ngai lo. Ram hruaitu nih tum chuan khua leh tui tha nih a zir hmasak phawt a ngai a ni. Politics chungchangah hian keini ho hi kan participation a tha hle a, a lawmawm, chu chu democracy-in a tum ber pawh a ni a. Nimahsela, tul lo khawp leh a tha lo zawng hian kan aware leh si ni hian a lang a, he lai tak hi kan khawtlang nun hian a chhiat phah niin a lang. Politics hi innghahna bera kan hman chhung chuan kan ram hian kawl eng a hmu lo ang tih a hlauhawm. Kan phak ang tawkin kan theih zawnah theuh eizawnna bul tan tum ila, kan din/bultan saa min puihtu atan chauh politics hi innghahnan hmang ila, tun ai hian kan khawtlang nun hi a nuam sawtin ka ring.

Tin, kan thil ngaihsan te pawh kan thlak a tul tak zet bawk. Kan va nih theih loh tur tih hriatsa ngawih ngawih ngaihsana an tih dan zir te hi sum leh hun hekna mai a ni a. Tun kan dinhmun tlu chhe mek atanga min khaichhuak thei tu pawimawh tak chu Zirna hi a ni a, hemi kawnga hlawhtlingte kan chawimawi thiama kan ngaihsan thiam a hun tawh tak zet a ni. Eizawnna kawng tam tak a awm a, kawng hrang hrangah hlawhtling tak tak pawh an tam narawh...amaherawhchu zirna (formal education) avanga hlawhtlingte hi an fei a, ram hnuk khawih pha thei thil rawn pawchhuah theitu an ni.

Rinawmna : Kan khawtlang nun chhe mek siam tha tur chuan Rinawmna hi a  pawimawh leh khawp mai. Kan ram leh khawtlang nun a chhiat chhan chu kan ram leh hnam, kan sakhuana leh keimahni leh keimahniah kan rinawm loh avang a ni. Duhamna hi rinawmna ti chhe thei tu lian ber niin a lang. Hnam upa em em nilo mah ila, naupang tak chu kan ni lo tiin kan inchhal fo va, nimahsela, tun thlengin hnam ziarang chhawm nun mumal taka sawi tur kan nei lo. Hei hian a entir chu kan hnamah kan rinawm lo tih na a ni. Kan sakhuana a dal nia kan hriat chhan chu Pathian tana kan rinawm loh vang bawk a ni. Look East  Policy-ina a ken tel tur nia kan ngaih changkanna leh hmasawnna nasa tak te hian nghawng tha leh tha lo tam tak a nei dawn a, chung nghawng tha lo lo thleng thei zawng zawng laka min chhan theitu tur chu he rinawmna chauh hi a ni a sin. A chhe lai siam tha turin kan hnam leh kan rinnaah hian i rinawm ang u.

Tlipna : Heng bakah hian ruihhlo-ina kan khawtlang nun a tihchhiat nasat avanga siam that ngai laite, nulat tlangval hman khawloh avanga a khawtlang huapa mualphona thleng thin siam that dan tur te leh thil dang tam tak sawi tur a la awm. Amaherawh chu, khing kan sawi tak leh kan sawi hmaih zawng zawngte khi mimal leh chhungkua atanga siam that theih vek an ni. Chhungkaw tin tangrual ila, kristian chhungkua kan din theuh chuan khawtlang nun nuam leh ralmuanawm tak kan siam ngei ang tih hi ka ring tlat a ni.

I Kianga Awm Tur Chauhvin

Tlang sang tak tak lawn chhuakin
Tuipui zau ber ber ka hleuh kai tawh a,
Mualzapui tam tak tlan pelin,
Kulh bang sang tak tak te pawh ka tehchhuak tawh asin;
I kianga awm turin,
I kianga awm tur chauhin.

Hmanhlel takin ka tlan zel a,
Khawizu ang maia thlum Hlimna te ka hnawl a,
Thihna kotlang hial rapin
Sual kut vawt pawh ka vuan hman hial a sin;
I kianga awm turin,
I kianga awm tur chauhin.

Phur rit tak phurin
Zahna kawn vawi duailo ka paltlang a,
Phuarna hrui te hian min ti chau bawk thin;
Meipuia kang ang maiin ka sahal a,
Mahse chawl lovin ka lo tlan zel e;
I kianga awm turin, I kianga awm tur chauhin.

Danglamna Danglam

I bula ka awmin tih danglamin ka awm thin a,
I hlata ka awmin ka danglam chuang lo!
Mual za kar dana kan awmin ka ngai thin che a,
Mual khata kan awm pawhin ka danglam chuang lo!
Zan ka mutin ka suangtuah thin che a,
Zinga ka harhin ka danglam chuang lo!
Ka hmaa i kalin i mawina ka thlir a,
Hnunglama i kalin chu tho chu ka ngaihtuah thin!
I tello chuan hringnun hi a danglam a,
Nang nen phei chuan a danglam vek bawk thin!

Another Obituary

Heard another tragedy today,
One lover boy kept his life at bay;
Life's so fragile, you know,
Loved ones,friends and foe
Met with the same fate in the end,
But why would one commit suicide and
Trade his life with the devil?
His life might be in peril,
Frustrated,cursed,and thirsty
or whatever feeling it might be;
The answers,i don't know,
I don't learn to know.
Will he,that poor soul
Respond to his call
Up yonder?
or
Will he not be remembered
As a dreamer
And too, a murderer?

Obituary

Heard a sad news this morning,
My Client,my favourite,enters heavenly boarding;
All her life,there was miseries,
All her life,she was in psychic casualties.
With Hope,and Sincerity,
She rested her cases upon me.
But now she is gone
Her cases undone.....
hope she finds a solace,
In the light of His Grace,
In that land,
a land where roses never fade.

HRINGNUN HI

Hringnun zinkawng chhukchho hi ka phak ang tawk lekin ka dawn ve neuh neuh thin a,a chang chuan mak tihna hlirin ka khat thin. A chhan leh vang hriat loh te hian thil danglam tak tak a thleng a. Kan duhthlanna te hian kawng engkimah min kaihruai a, nimahsela,a chang chuan duhthlan tur dang leh chuang neih loh laite pawh a awm leh lawi bawk si. Damchhung khawsak buainate avangin nitin a kul a taiin kan buai phili a,nun nuam zawk beiseiin thlan chhuak meuhin kan thawk a, kan thawhchhuah pawh a tam na rawh ei. Nimahsela,khaw nge nun nawmna chu a awm tak, Sam ziaktuin mihring nun damchhung reina chu thawhrimna mai a ni alo tih hi a dik takzetin ka hre thin.

Kawla ni chhuak chhiarin tuk tin dawr ka hawng a, nilengin buai namen lovin ka buai thin a, tlawmngaia min dawrtute zarah chhun rawl fak hman loh chang ka ngah mai. A hminga ukil nih ve takah chuan case hmuh ang angte zirchiangin zanah rei tak tak thleng ka meng a,zingah a ngaite bawkin ni chhuah hma atangin hna ka bung tan leh a, kohhran inkhawm zanah leh thalai programme te ngai pawimawh vein a theih chin chinah ka tel a, heng thawhrimna avang hian nun hahchawlhna emaw nun nuam zawk emaw ka chhar awm reng reng ka hre chuang lo.

Ni khat chu sumo-in ka zin a,he thu bawk hi ka ngaihtuahnaah alo lut leh a. Sumo khalhtu te hian tuk tin mai
khel loin an lirthei an khalh chhuak a,zinkawng thui tak tak an zawh a,tlai tak takah an thleng a,a tuk zingah a ngaite bawkin an fehchhuak leh a. An thawh chhuah sa chen turin hun an nei mawlh lo hian ka hre thin. Chhungkaw tan hun pek tur tam an nei lo a,thenrual kawmna hun an nei hek lo. Nun nuam zawk beiseia rim taka thawk si khan khawnge hahchawlhna chu an hmuh tak le?

Dawrkai hote,huan leh lo neia ei zawngte,sawrkar hna thawk hote pawh an bang bik lo hian ka hre thin. Sum tam tak hlawhchhuakin hna an thawk a,chung sumte chu a hmanna sawi sen loh a awm ngei ang. Nimahsela,a thawkchhuaktu ber atan hian a dang thawkchhuak leh tura hun hman ngawt loh chu tih tur em em a awm leh tlat si lo. Hringnun hi a mak teh a nia.

Hei zawk hi a ni thei ang em: thawhrimnaah hian nun nawmna chu a awm tih hi. A chhanna erawh kei chuan ka la hre thei mai rih lo!