Sazupui ka vulh ve a

Sazupui ka vulh chakna hi a rei tawh hle a, hmanah Shillong-a lehkha kan zir laiin Bah Kama fapa u Mapuia  khan a vulh thin a, an in ka kal pelh apiang khan ka thlir ning lo a ni ber mai. Tin, bazarah khan sazupui sa kha kg 1 Rs 120/- in kan lei thin a, a thianghlim a, sa tui tak a ni bawk. A sa tui zia chu thuhranah lo dah ta ila, an thianghlimin an no ser mai a, a mitmeng sen nalh lutuk te, an beng sei an han tun va thin te hian nun hi an ti hlim ngawh ngawihin ka hre thin.

Nikum khan ka thianpa Zatea’n sazupui nupa chu min pe ve hlauh mai a, an hmingah Anil leh Anjali ka phuah nghal a. Unau mah nise, thla li-a upa an nih meuh chuan an inunauna an inhre chang tawh lo a, hmangaihna lipui an liluh bawrh bawrh ni hian a hriat a. Kan chhungkua hian kan duatin kan han ngaihsak khawp a, sazupui lo vulh tawhte tih dan te kan zawt kual a, an chanchin zirin internet lamah hun tam tak ka hmang a, tuk tin leh tlai tin chaw tha tha ka hlui hlawm a, khawhar an hnem ve chiang teh a sin.

Thla ruk an nihin a vawi khatna atan Anjali chu a rai ta tlat mai a. Tleirawl mai nia kan hriat avangin a rai tih chu keini pawh chuan kan hrethiam lawk lo a. Sawi lawk miah lovin tuk khat chu note pahnih an lo hring reng hi a lo ni a, a thi a chhuak nasa hle a, a lo inhliam ve nasa ngiang mai. Nimahsela, chung no duhawm tak takte chu nikhat pawh an dam lo. A thla lehah chuan an nei leh nghal mai a, tun tum chu pathum zet an ni. Ni hnih an dam a, an thi leh ta. A ngaihna kan hre lo hle mai. A hnuah thlasik khawvawh ber laiin zan tairekah an nei leh , hei pawh ni hnihnaah an thi leh a. Kumin April thla khan vawi khat dang an nei leh a, pali lai an nei a, dam chhuah tir ve hram kan duh laiin puih ngaihna an vang angreng lawi sia, ni li an dam a, an vain an thi leh phiar a. Ran vulhah hian ka tluang lo em ni dawn tih ka inngaihtuah a, kan naupan ve lai pawn ar 60 chuang te pawh keimah chauhin ka lo enkawl ve tawh thin kha a nia, ka tluanlohna tur reng reng ka hre si lo. Sazupui vulh chu ka beidawng ta khawp mai a, a engapawh chunise, vawi khat na na na chu no nei leh phawt se, an damchhuak zo lo a nih leh ngai chuan a tihral dan ka ngaihtuah tawh mai ang tih rilru ka pu hman a. Kan calendar-ah chuan ‘Sazupui no neih ni’ tiin April 17 chu ka chhinchhiah ta nghe nghe a.  

A no neih hnunhnung ber atanga a thlakhatna cham chiah May 17 zan chuan Anjali chuan note 6 a hring leh tlat mai. Khawlum lai a ni bawk a, an thi tawh tur a nilo tih chu ka thupui ber a ni ta. Tichuan, in hrang kan sak sak a, bawm chhung lum nuam takah note duhawm tak takte leh an pui Anjali chu kan dah hrang a, hmun finrialah an in chu kan hung ta daih a. A tirah chuan paruk an ni a, mahse a te ber, a budelh chuan ni hnih chiah min dam pui a, panga dang te erawh an hrisel thain hnute an dawng tha tih hriat tak hian an sen deuh lal a. Chutih lai mek chuan an pa ber, Anil-a khawhar lungleng lutuk hi a khawngaihthlak khawp mai. Chaw a ei hleithei lova, a che chang peih lo a ni ber mai. In pakhat zawkah erawh Anjali te nu fa rual chuan hringnun hmachhawn dan an zir ve mek a, a ni telin an thang a, kan hlim tlang hle mai.

Ni thum-a upa anih vel atangin an hmul a to tan a, ni sawm an tlin chiahin an mit a keu a, ni 14 an nih atangin hnim hnah nem an ei thei tan, hei hi ka chhinchhiah dan a ni. A note zingah chuan pakhat an piantirh ata lian fal deuh hi a awm a, chu chu a mit pawh a keu hmasa ber a, engkimah a unaute hma a hruai nia ka hriat avangin a hmingah Lalhmahruaia kan ti a! A unau dangte hming chu Harnandez Vanbawiha, Kungpuii, Lee Dong-uk, leh Sonia te an ni. Tun tum chu Pathianin min enkawl sak a, hrisel takin an thanglian ve zel a, kan lawm em em a ni. Leilung dan ina a ruat ang zelin thil hi a lo thleng a lo ni a, no an neih hmasak khan hnute hnek luih tir tumin vawi tam ka bei a, mahse ka hlawhtling lo anih kha. A hun tak ah leilung dan/khuarel chu a lo inherchhuak a, Anil leh Anjali te pawn chhungkaw thar, chhungkaw hlim tak an nei ve ta.