I Reh Hlen Ta Si

I anka nemte kha ka beng chhe ri-ah a la cham reng a,
I la hre ve reng em?
Mittui nen hlim takin kan inmangtha a,
Tunah khawnge i awm tak?

A tha e,
Muangten laikhum bel la;
Ka thinlungah i cham reng tih dawn tel la.

I inkhel kan thlir laia kan nui rite kha ka hre reng a,

Aw tuin nge hrelawk ang ni?
Tuifawnin chhawl a len bo ang maia
I reh hlen tur hi.

A ni thei lo,
Muangten laikhum ka bel thei lo;
I reh hlen dawn tih tal lo hre lawk tehreng ila.

Khawharna

Khawharna lamtluang chhuiin,
Khawharna tuipuiah karfung ka lek a,
Khawharna vaukama ka teikual laiin,
Khawvel chu khawhar takin a vir muai muai a.

Zan thim khawharthlak tak hnuaian,
Mutmu tuah loten hun hlui ka dawn a;
Hunin hun thar a herchhuah pui zel a,
Nun thar erawhin kawlah ek a la thai si!

Khawharna vartianah a ngaite'n ka thangharh a,
Bawh-ar lungmawlten zaihla tin min lo chhawn a;
Ka koki-a an lu nghata mittui ka hrukhul sakte khan
Ka khawhar ber lai hian khawnge min vahbosan tak si!

Khawharna chu ka thian tha ber a ni a,
Reh ri chu ka tan ri mawi ber a lo ni ta,
Sana ban vai ai ka lung a phut ran zawk vang em ni,
Nghakhlel, enghelh leh ruak taka ka awm reng ni?

I Kiangah Ka Awm Reng Ang

Hun chu khirhin
Ni khat vuiliam nan i chakna beitham mahse,
Hlim nui ri te chu lo chuai zovin,
Thihna kut vawt pawh lo hnai mahse,
I kiangah ka awm reng ang.

Zan chu lo reiin
Mangchhiate'n chim buai mah che sela,
Ni tharin mittui nen lo hmuak chein
Beidawnna chuan a thla lo zar mahse,
I kiangah ka awm reng ang.

Naupang Thinlung Demna

Fing inti-in thiante zilhna kha ka lo ngainep a;
I mi khawihna khan thuril zawk min hrilh reng chung si khan,
Ka chak lohna-ah riak ka lo ngai che a,
Chak taka awm turah ka lo inngai bawk a;
Ka la naupang a, ka hlauthawng a, ka dik lo a ni.

Ka tha tih zawngin hringnun lamtluang ka chhui a,
Hmangaihna hi thil hlauhawmah ka lo ngai thin;
Chhanlet loh hmangaihna ai pawha na chu
Hmangaih tih inhriat loh hi alo ni zawk reng si;

Ka la naupang a, ka hlauthawng a, ka dik lo a ni.

Tunah zawng nang ngaih nan leh inchhirnan,
Zan khat pawh hi a thlawnin a ral ngai lo asin;
Ka thinlungin i hming a lam chiam lai hian,
Ka lo inchhuanna thin ka rilru chapo chu ka hau a,
Vaihna rama min dahtu chu thinlung ngei chu.

Kar Lam Hla

Ka la kal ngai lohna hmunah riahrun i rem a,
Ngaihruat pawh ka thiam lohna hmunah laitual i leng a,
Nui hiauvin ka chhingmit thlir phak piahah hun leh ni i chhiar a,
Boruak thianga i zun leng velte chuan tangah min phuar si amaw;
Phuarna hrui hmawr vuantu chu ka rawn zawng ang!
Ka rawn zawng ang che, an sawi chhimbal zungkaihna thleng pawhin;
Ka rawn zawng zel ang che, chatuan leh nikhat a kin thleng pawhin.

Run Mawitu Zuapa

Hringnun hnuchhawna fam i chan ni khan,
A nghing asin kan khawvel zawng zawng hi;
A na lua e, i thai leh hraite tan,
Kir zai rel lo te'n mual i liam ta si.

Hmanah i hmangaihna thlazar hnuaiah,
Zalenna nun famkim kan chen thin a;
Tunah erawh i thlan rolung chungah,
Tapin kan dawn kir chhungkim hlimlai kha.

Min ti hlimtu kan mawina ber zuapa,
Nang ngaih lai kan bang lo'ng hring chan chhungin;
Hunin nun thar her chhuahpui mahsela,
Tahlai kan bang lo'ng nang ngaih vang hianin.

Khawvelah i khual zinkawng tawi mahse,
Kan nghilh lo'ng che, kan hmangaih reng ang che.

Misual Chhandamna

Khawvel chhandam tura lokal Isua,
A tlawm lua e, a pianna leh thihna;
Bawng in tlawm a bel, hruihrualin an vua,
Kraws puin Kalvari-ah a fam ta.

Hmanah Mosian dar rul a khai kang a,
Rul chuk miin a en a, a dam ang khan,
Kraws-a tuar Lal Isua hmel en ila,
Damna kan chang ang tisa thlarauvan.

Mifel thih ang thi tlak lo thihna khan,
Chatuan mei ata hringfate min chhan;
Sual ber anga thi mi fel famkim khan,
Chatuan  nun ka neihnan a nun a hlan.

Kei misual min tlannan thih a thlang maw,
A tan theih tawk hlan ve thei ila aw.

Krista Pasalthate

Ram tha lehzual luah tumin an chhuak,
Harsatna chhum zingten an lo hmuak;
An zam lo, kir zai rel lo ten hma an sawn,
Thim leh suar, hmelma doral hrang an tawn.

Sengkhawm tur a tam buhhmunah chuan,
'Hlau suh' tiin thlarau chuan a lo muan;
An at zel tinreng doral karah,
Ringlo mi- hausa, rethei, mawl leh fahrah.

Zum leh hriam karah hmangaihna avangin,
Chanchintha chi an thehdarh thin;
Thuneitu thupek ang ngei khan,
Huaisen takin A hming an tan.

Dodaltu an hrang, kiltin an vel,
Manin an awm, tan-in thim an bel;
Hmangaih Pathian chuan a lo thlir reng a,
An tih that a hria, a chhuah leh ta!

Tlachhamin an awm silh leh fen,
A ruak fairel bel, an nei lo nai-a-sen;
An neih chhun thil ropui Rinna
Chuan  a pumpelh tir thin thihna.

Par a chhuang e an chi kui tiahin,
A chul leh tawh lo'ng chatuanin;
A tirtu Thlarau khan a  enkawl ang a,
Hmangaihnain a chawm nung reng dawn si a.

Khawvel hriattham lohin an hna tlawm mahse,
Van khawpuiah chuan an la thang mawi khawp ang le;
Ropuina ni-ah chuan Krista pasalthate chu
Mitinin an la hrilh ang an lawmthu.

Malin Ka awm Lo'ng

Vaihna ramah thlipui hrangin min nuai a,
Inphenna tur zawngin ka vak ruai a,
Ding leh vei thlan tur hre lovin ka buai a,
Ka phur rit tak chuan mi lo uai a,
Ka tan rose par mawi ber a chuai a,
Kumtluang par pawh a vuai ta.
 
Mahse a thawka ka thawk ve chhung chuan,
Tawn zel nang e rumna tuipui so phuan;
Hei chauh hi a ni ka hmachhuan,
Ani'n mi chelh, thlah lovin mi vuan;
Chu te chauh bawk chuan a ni min muan,
Malin ka awm lo'ng, hmangaihna ka neih chhung chuan.

Nguaina Hmun

Nguaina hmunah zuaina hriin min man a,
Thim leh hnim zingah ding leh vei ka bo tawn!
Ka damdawi ei lai a zo a, ka la dam si lo,
Ka tan hringnun lamtluang a chho lua e

Ka Tlawm Ta

Min pel a, min sel a,

Min nek a, min hek a,

Min bawr a, min nawr a,

Min pawt a, min zawt a,

Min zim a, min lim a,

Min perh a, min kherh a,

Min rap a, min hlap a,

Min kuai a, min nuai a,

Min beng a, min deng a,

Min tum a, min chum a,

Min ham a, min tham a,

Min zen a, min pen a,

Min kek a, min rek a,

Min seh a, min theh a,

Min sat a, min at a,

Min nawk a, min nghawk a,

Min chek a, min hnek a,

Min tlawh a, min sawh a,

Min pet a, min vet a,

Min chaih a, min paih a,

Min kap a, ka tap a;

Ka indawm a, ka tlawm ta.

I Nui Mawi Hi

Hlimna leh lungngaihna mittui,
Tawngka aiin mittui hian a sawi tam zawk thin si a;
Beiseina mittui kara i nui mawi hi,
Dam chhung min chelh tura'n a chak tawk a ni.

Rawn Tir Rawh

Rawn tir rawh, i hlimthla mawi, chhawrhthlapui hnuaia'n,
Rawn tir rawh, i zun rimtui, virthli lenga'n,
Rawn tir rawh, i anka nem, dar zama'n,
Nang ngaih vanga ka fam i phal dawn em ni?!

A Tawi Lua E

An run mawitu zuapa nunnem,
Hal lote'n hawilopar i thliak ta maw?
A mi leng thinlai ai ang i zem,
Tih theih reng kan nei ve si lo a aw....

Fam hun leh ni i hai lua e,
Chunnu leh hrailengte hmangaih-lai,
Rihsang kaia'n i pamhmai e,
A tawi lua e par ang i vullai.

Ka Hma Chhuan

Tahna ram biruksan tumin ka phili a,
Hlimna zawnga ka zinkawng a tawp ta ka ti a;
Mahse raltianga'n hnemtu aw nem chuan,
'Kal zel rawh, duhtak' tiin mi lo muan!

Pumpelhna zawngin ka vak vel ruai a,
Vuakna vualte chuan ka tha min phet a,
Mahse min kotu rauthla chak tak chuan
Ka tlu tur vengin chawnbanah mi vuan.

Hmangaihna dik zawnga ka khualzinna
Lo tawp thuai se a kiangah chawl ila,
Lungdumtu nen hmangaihna pangpar huan
Fan vel hun tur mawlh mai chu ka hma chhuan.

Tui ang Khat liam

Ka ngaina che tiin min fiam,
Hawi duh lengten min chhaih chiam;
A riang hi hrilh haiin min siam,
Thinlaiah erawh tui ang a khat liam.

Kei Chuan

Nihawipar hian zantiangah hawina lam tur a vai thin an ti,
Kei erawh chuan chung chhawrhthlapui khi ka thlir a,
Ka hre chhuak vawng vawng che asin.

Hawilopar hian a di tawn ve nan hawina lam a nei lo em ni?
Kei erawh chuan hmar arsi awmna lam ka thlir a,
Rauthla lengin ka tawng che asin.

Kumtluang par hi a vul kumtluan reng em le?
Kei chuan chunga siruk te khi ka thlir a,
Ka hmangaihna che hi a kumtluan ka ring asin